10:56, 11 Yanvar 2019 (Cümə) 542

Prezident yeni cəzaları təsdiqləyib

Prezident yeni cəzaları təsdiqləyib
Prezident İlham Əliyev İnzibati Xətalar Məcəlləsinə dəyişiklikləri təsdiqləyib. 

Məcəlləyə olunan əlavəyə əsasən, dərman vasitələrinin istehsalına, daşınmasına və saxlanmasına, eləcə də topdan satışına dair tələblərin pozulmasına görə vəzifəli şəxslər min beş yüz manatdan iki min beş yüz manatadək məbləğdə, hüquqi şəxslər beş min manatdan yeddi min manatadək məbləğdə cərimə edilir.

Eyni xəta inzibati tənbeh vermə haqqında qərar qüvvəyə mindiyi gündən bir il ərzində təkrar törədildikdə vəzifəli şəxslərə iki min beş yüz manatdan dörd min beş yüz manatadək məbləğdə, hüquqi şəxslərə altı min manatdan səkkiz min manatadək məbləğdə cərimə düşür.

Başqa bir əlavəyə əsasən, aptek təşkilatlarına dair tələblərin pozulmasına görə vəzifəli şəxslər beş yüz manatdan yeddi yüz manatadək məbləğdə, hüquqi şəxslər min manatdan iki min manatadək məbləğdə cərimə cəzası alır.

Xəta inzibati tənbeh vermə haqqında qərar qüvvəyə mindiyi gündən bir il ərzində təkrar törədildikdə vəzifəli şəxslərə min beş yüz manatdan iki min beş yüz manatadək məbləğdə, hüquqi şəxslərə beş min manatdan yeddi min manatadək məbləğdə cərimə kəsilir.

Novator.az