Martın 12-dək Avropa Şurasının Nazirlər Komitəsi Azərbaycanın keçmiş səhiyyə naziri Əli İnsanovun şikayətinə baxacaq.
Məlumatı REAL Partiyasının sədri İlqar Məmmədov "Facebook" səhifəsində paylaşıb.
İ.Məmmədov bildirib ki, Ə.İnsanov 2018-ci il dekabrın 14-də Nazirlər Komitəsinə məktub yazıb.
"Mən cinayət törətməmişəm. Artıq 14-cü ildir həbsdəyəm. Hakimiyyət məni özünə müxalifət hesab edir və bu səbəbdən Avropa İnsan Hüquqları Məhkəməsinin 14 mart 2013-cü il tarixli qərarını yerinə yetirmir”, - Ə.İnsanov məktubunda deyilir.
REAL sədri qeyd edib ki,Əli İnsanov dərhal azadlığa buraxılmalıdır: "İşin qətiyyən qeyri-məqbul olan tərəfi - ona verilmiş 11 illik cəza qurtarandan sonra cəzanın 7 il artırılmasıdır. Əvvəllər cinayət törədibsə də, törətməyibsə də, o artıq azadlıqda olmalıdır, dərhal. Nazirlər Komitəsi məsələni gündəliyinə salıbsa, demək ya qərar, ya da qətnamə qəbul etmək niyyətindədir. Bu sənəd haqqında Azərbaycan hakimiyyətinin şübhəsiz ki, xəbəri var. Əgər o, sənədi ciddiyə alırsa, onun qəbul edilməsinin qarşısını almaqdan ötrü Əli İnsanovu iclasa qədər azadlığa buraxa da bilər, ya da ən qısa vaxtda buraxılması haqqında Nazirlər Komitəsilə anlaşa bilər”.
Öz növbəsində, Azərbaycan hakimiyyəti bu il fevralın 8-də Avropa Şurasının Nazirlər Komitəsinə cavab məktubu ünvanlayaraq, Əli İnsanovun haqlı və qanuni olaraq cəzalandırdırıldığını bildirir.
Əli İnsanov 2005-ci il oktyabrın 19-da dövlət çevrilişinə cəhd ittihamı ilə həbs olunub. Lakin sonradan cinayət işi vəzifə cinayətlərinə dair ittihamlarla məhkəməyə gedib və ona 11 il həbs cəzası verilib.
Həbs müddətinin bitməsinə iki ay qalmış – 2016-cı ilin avqustunda ona yeni cinayət işi açılıb.
Keçmiş nazirə CM-in 234.1-ci (narkotik və ya psixotrop maddələr əldəetmə, saxlama), 315-ci (hakimiyyət nümayəndəsinə zor tətbiqetmə) və 317-2.1-ci (cəzaçəkmə müəssisələrində qadağan olunmuş əşyaların hazırlanması, saxlanılması) maddələri ilə ittiham irəli sürülüb. Kamerada psixotrop tərkibli dərman saxlamaqda, Penitensiar Xidmətin əməkdaşını vurub ona kəllə-beyin travması yetirməkdə suçlanan 70 yaşlı sabiq nazir 2017-ci il aprelin 26-da 7 il azadlıqdan məhrum edilib. İyunun 22-də Bakı Apelyasiya Məhkəməsi hökmü qüvvədə saxlayıb. Yanvarın 16-da isə Ali Məhkəmədə bu məsələyə baxılıb və qərar qüvvədə saxlanılıb.
Ə.İnsanov ittihamları qəbul etmir. Keçmiş nazir hakimiyyəti, şəxsən prezident İlham Əliyevi tənqid etdiyinə görə onun sifarişi ilə saxta ittihamla cəzalandırıldığını deyir.
Pərvanə Qurbanlı
Toplum Tv
Toplum TV Azərbaycanın müstəqil xəbər platformasıdır. Ölkədə və bölgədə baş verən hadisələri dəqiq və qərəzsiz şəkildə izləyicilərimizə çatdırırıq.
Toplum TV hər gün siyasət, iqtisadiyyat, sosial, kriminal, gender mövzularında reportajlar və xəbər proqramları, tolk-şou və müsahibələri diqqətinizə təqdim edir.
Ən doğru xəbərləri izləmək üçün Toplum TV-yə abunə olun.